Bigkis ng kaligtasan at tagumpay

March 31, 2020

NAGKAKAMOT siguro ng ulo ang Amerika ngayong nagkukulang sila ng mga nurse matapos maghigpit sa mga dayuhang nurse kabilang na ang mga kababayan.

Kapos sa health workers ang Estados Unidos upang pangalagaan ang libu-libong Amerkano na tinamaan ng Covid 19.

Mahigit 240,000 na ang kaso ng Covid 19 sa US habang lagpas naman sa 2,400 ang namatay na Amerkano dahil sa naturang sakit.

Patuloy ang pagtaas ng bilang ng Covid 19 cases sa US, Ramdam na ng US government ang kahalagahan ng karagdagang nurse upang tugunan ang krisis.

Sa tindi ng kaso ng Covid 19 sa US, mas malala na ang lagay nito kesa sa China na ayon sa ulat ay dahan-dahan nang nakakarekober.

Bago ito ay naglipana ang mga Pinoy na nurse sa US dahil sa mas mataas na sahod at mas maayos na buhay doon. Pero napuna ng US government na naaagawan ng trabaho ang mga Amerkanong nurse.

Hindi nagtagal ay itinigil ng mga kano ang pagtanggap ng mga Filipino nurses na ikinalungkot ng marami nating kababayan na umaasa ng mas magandang kinabukasan sa Amerika.

***

Sa kabilang dako, nakinabang naman ang Pilipinas sa nangyari dahil marami sa ating mga nurse ay napilitang manatili sa ating bansa.

Sa paglaganap ng COVID-19 sa Pinas, natanto natin ang kahalagahan ng mga nurse na handang magbuwis ng buhay sa gitna ng krisis.

Sana naman ay magsilbi itong aral sa ating gobyerno. Alagaan natin ang ating mga nurse. Kilalanin natin ang kanilang kahalagahan. Suklian natin ng paggalang ang kanilang propesyon.

Sa kasalukuyan, hindi kagalang-galang ang sahod na kanilang tinatanggap sa mga pagamutan ng ating bansa.

***

Ipinapahiwatig ng COVID-19 na kailangan nating palakasin ang ating health care system.

Dapat pondohan ng gobyerno ang malawakang programa para sa pagpapatayo ng mga pagamutan at mga pasilidad na tutugon sa mga kababaayan natin na may karamdaman.

Malaki ang dahilan upang palawakin ng gobyerno ang suporta nito sa edukasyon at pagsasaliksik upang mapagyaman natin ang ating kaalaman sa mga naglilitawan na mga bagong sakit.

Hindi dapat magdalawang isip ang pamahalaan na gumastos para sa mga makabagong teknolohiya at kagamitan na mahalaga sa paghanda ng ating kinabuksan.

***

Kahanga-hanga ang pagtugon ng mga Pilipino sa  krisis na bumabalot sa ating bansa.

Binulaga man tayo ng COVID-19 ay buong tapang pa rin itong hinarap ng ating pamahalaan at ng ating mga kababayan.

Mapalad ang mga Pilipino dahil may mga opisyal ng pamahalaan na nakatuon sa ating mga suliranin at walang humpay na kumikilos upang labanan ang COVID-19.

Swerte rin ang pamahalaan dahil sumusunod ang mga mamamayan sa direksiyon nito.

Ang malakas na liderato at pakikisama ng publiko ang nagsisilbing bigkis nating lahat para sa iisang landas tungo sa kaligtasan at tagumpay.

Mabuhay tayong lahat. 

**

For comments, please call or text 09569012811 or email lastmohican2004@yahoo.com