Cong. Crisologo ‘tablado’ rin kay President Duterte?

“NAGULANTANG” noong nakaraang linggo ang “madlang pipol” sa Intramuros matapos “dakmain” ng mga operatiba ng National Bureau of Investigation (NBI) ang isang ‘contractual employee’ (job order) ng Bureau of Immigration (BI) sa loob ng isang ‘coffee shop’ sa kasong ‘robbery extortion’ sa halagang P.15 milyon.

Sa mga ulat, ang “pinosasan” ng NBI ay itong si Joel Sales Mon, isang dating kasapi ng militar, batay sa reklamo ng isang babae na ang asawang dayuhan ay nahuli naman ng BI sa kasong ‘overstaying.’

Matapos ang insidente, mukhang “napasukan” ng “malisya” ang mga sumunod na pangyayari, mga kabayan.

Dangan kasi, “nakaladkad” ang pangalan ni Atty. Aldwin Alegre, ang bagong talagang BI assistant commissioner, kapalit ni ex-Asscomm. Aimee Neri na lumipat naman bilang undersecretary sa DSWD.

Ang siste kasi, ‘naka-detail’ pala itong si Mon kay Asscomm. Alegre na noon lang Enero natalaga sa BI at “mainit” pa nga ang naging “pagsalubong” sa kanya nitong ating kaibigan at “kumpare” na si Comm. Bong Morente, gayundin ang iba pang mga opisyales at empleyado ng BI.

Batay naman sa nakalap nating impormasyon, ilang araw nang masama ang pakiramdam ni Asscomm. Alegre at sa katunayan ay hindi na siya nakapasok noong Lunes, Marso, 18, ang araw na “nasabit” sa kabulastugan itong si Mon.

Kung titingnan din ang “rekord” nitong si Asscomm. Alegre, aba’y hindi lang pala siya abugado, bagkus, isa rin siyang ‘CPA’ (certified public accountant) at ang ipinagtiwalang posisyon sa kanya ni Pang. Rody ang ‘first job’ niya sa gobyerno.

Translation? Hindi na kailangan ni Asscomm. Alegre ang pumasok sa gobyerno kung tutuusin para lang magkapera dahil “mayroon” na siya nito; ang hindi niya puwedeng tanggihan ay ang “hiling” sa kanya ng ating Presidente na “tulungan” siya sa kanyang mga programa para sa bayan.

At dahil may “iniingatan” na pangalan, kasama tayo sa naniniwala na inosente sa mga malisyosong bintang itong si Asscomm. Alegre.

Nalaman pa natin na ‘purely internal BI management and supervision’ ang “ibinigay” na ‘assignment’ dito kay Asscomm. Alegre ni Comm. Bong. Translation? Anong kinalaman niya sa “pagpapalabas” sa ‘detention cell’ ng BI sa sino mang nahuhuli sa paglabag sa ‘Immigration laws,’ aber?

Kaya sa mga nagpipilit na bigyan ng “malisya” ang insidente, eh, please stop, ladies and gentlemen because the insinuation simply would not fly for lack of credibility, hane?

* * *

Viral na ngayon sa ‘Internet’ ang isang video kung saan mapapanood na nailang at tahasang tumanggi si Pangulong Digong sa mistulang “pamimilit” sa kanya ni Quezon City mayoralty candidate, Cong. Bingbong Crisologo na itaas ang kamay nang huli bilang pagpapakita ng kanyang pag-endorso sa kandidatura nito.

Ang naturang viral video ay kuha mismo ng RTVM (Radio Television Malacanang) sa isang campaign rally ng Partido Demokratiko Pilipino-Lakas ng Bayan (PDP-Laban) sa Zamboanga City noong Marso 3, kaya hindi puwedeng sabihin na ‘splice’ o “gawa-gawa” lang ito ng mga kalaban ni Cong. Bingbong.

Makikita sa video ang biglang pag-epal, ehek, pagpanhik sa entablado nitong dating ‘political warlord’ ng Ilocos na “pinaunlakan” naman ni PDU30.

‘Yun nga lang, mapapansin na agad “ibinulsa” ng Pangulo ang kanyang mga kamay at halatang naiilang siya at parang “napikon” pa nga sa “hirit” nitong kalaban ni QC-VM Joyce Belmonte na “itaas” na ang kanyang kamay.

Hmm. Ano kaya ang “hugot” ni Pang. Digong dito kay Cong. Bingbong?

Ang sagot sa tanong na ito ay “lilitaw” sa “mantsadong rekord” ni Bingbong at ng kanyang pamilya sa Ilocos Sur.

Sa panahong gubernador ang kanyang ama, si Bingbong ang kilalang “amo” ng notoryus na mga “saka-saka” o ‘barefoot goons’ -- na isang ‘private army’ ng mga Crisologo.

Ang kuwento, basta “kontra” ka sa mga Crisologo, may “paglalagyan” ka. Kumbaga, “takot na takot” ang mga Ilocano sa mga Crisologo, lalo na kay Bingbong.

Sa katunayan (at dokumentado ito sa hukuman), kaya nakulong si Bingbong at matagal na “naghimas” ng rehas na bakal sa Muntinlupa ay dahil “ipinasunog” ni Bingbong sa kanilang ‘private army’ ang Ora Centro at Ora Este -- ang dalawang barangay sa Bantay, Ilocos Sur na “naglakas-loob” na “suportahan” ang kandidatura ni Chavit Singson noong 1969 gubernatorial race.

“Matindi” ang naging galit ni Bingbong dahil “tinalo” ni Chavit ang ina ni Bingbong sa naturang halalan.

Matagal na ang pangyayaring ito at ayon pa nga sa kanyang kampo, “nagbago” na siya at umano’y naging “malapit na sa Panginoon.

At dahil may ‘political connections,’ sa halip na habangbuhay na pagkabilanggo, nabigyan siya ng ‘pardon’ ni Pang. Marcos.

Ang ‘image change’ niya na ito -- mula sa isang pagiging ‘Warlord’ tungo sa pagiging ‘servant of the Lord’ --  ang kanyang naging “puhunan” upang muling makabalik sa pulitika.

Kaya ang tanong ng ilang miron, “totoo” na kaya ang naging “pagbabago” ni Bingbong o naging “kasangkapan” lang niya ito upang muling makabalik sa poder ng kapangyarihan?

Ano man ang totoo, ang “malinaw” sa lahat, ang “lagim” na iniwan ng kanyang ginawa, sa kamalayan ng mga Pilipino, ay talagang mahirap makalimutan.

Aber, nito lang huli, hindi malaman ng mga miron kung “seryoso” o “nagbibiro” lang si PDU30 sa kanyang pahayag na “baka” lumaganap ang “patayan” sa Quezon City dahil sa pagtakbo ni Bingbong sa halalan bilang mayor.

Ikaw talaga, Mr. President, “bad” ka, hehehe! Abangan!