Pagandahin ang logistics performance ng Pilipinas

April 25, 2020

HABANG hinihintay ng sankatauhan ang bakuna at gamot laban sa COVID 19, kailangan maakit ng Pilipinas ang mga banyagang kumpanya  na dito na lumipat dahil  aalis na sila sa China bunga ng US-China Trade War at ng global “recession”. Kailangan pagandahin ang logistics performance ng Pilipinas para mangyari ito.

Kung dito sa Pilipnas sila lilipat, maraming  bagong trabaho at dagdag na buwis ang ating kikitain. Hindi maaaring puro call centers na lang palagi ang papasukan ng mga Pilipinong manggagawa at POGO na lang ang pagkukunan ng dagdag na buwis.

Ang pamahalaan ng Japan ay naglaan ng U$ 2.2B na tulong pinansyal para sa mga kumpanyang Hapon na aalisin ang kanilang mga factory  sa China at  ibabalik sa Japan o ililipat  sa South East Asia. Batay sa  2019 Report ng Japan External Trade Organization (JETRO), ang mga bansang Vietnam (42.3%), Indonesia at Thailand (20.6%)  ang mga bansang napipisil na paglilipatan ng mga kumpanyang Hapon. Pang-apat lang ang Pilipinas (18.6%). 

Ang Pilipinas ay pang 60th lamang sa 168 na mga bansa at nagtamo ng score na 2.9 sa World Bank Logistics Performance Index para sa 2018. Ang Thailand ay pang 32nd sa score na 3.41, 39th ang Vietnam sa score na 3.27, ang Malaysia ay pang 41st sa score na 3.22, at 46th ang Indonesia sa score na 3.15. Sa ASEAN, Singapore ang no 1. 

Ang logistics performance index ay may 6 na components: customs, infrastructure, international shipments, logistics quality and competence, tracking at tracing, at timeliness. Mababa ang marka ng Pilipinas sa lahat ng ito maliban sa international shipments. 

Kailangan bumuo ng isang task force ang Palasyo na pamumunuan ng DOF, DTI, DoTr, DICT, DPWH, at CHED upang tutukan ang mga reporma sa kani-kanilang sector upang humalimuyak ang Pilipinas sa mundo ng logistics services. Ang anim na components na ito ang dapat hanapan ng solusyon ng task force ng palasyo sa lalong madaling panahon. 

May dalawang taon pa ang administrasyon na ito para pag-igihin ang pangangasiwa ng customs clearance procedures. Isa ito na nagpababa ng marka ng Pilipinas sa Logistic Performance. Isa rin ito sa mga reklamo ng mga shipping lines kaya may port congestion at bumabagal ang turnaround time ng mga container vans nila. Kasama ako sa bumalangkas ng bagong batas sa Customs subalit hindi naman ipinapatupad ng maayos ang mga bagong probisyon nito para bumilis ang proseso ng clearance ng mga kargamento.

Dapat iwaksi na ang makalumang pananaw na isang law enforcement agency ang Aduana na ginagawang pahingahan ng mga nagreretirong pulis o sundalo. Malaki ang papel na ginagampanan ng Aduana sa International Trade at Logistics Management at ang mga nakakaintindi nito ang dapat mamuno sa Aduana.

Huwag lang commuter subway at railways ang gawin sa Build , Build, Build. Kailangan mayroon din mga tren para  sa mga kargamento mula Pier at Airport na didiretso na sa mga warehouses o di kaya sa mga industrial subdivisions at pabalik sa mga ito. Sa ganitong paraan, maiiwasan ang trapik sa kalsada at ang iligal na pangongolekta ng bayad sa mga delivery trucks na dumaraan sa teritoryo ng  mga LGU.

Kailangan bumalangkas ang CHED  ng mas magandang curriculum para humusay  ang pagkaunawa at “know-how” sa supply chain management and operations at logistics management ng mga magtatapos ng mga kurso na may kinalaman dito. 

Isa sa mga malaking suliranin ng Enhanced Community Quarantine ang pagkasira ng supply chain flow of food and medicines. Hindi ito nauunawaan ng maraming LGUs, PNP. AFP at ng mga miyembro ng IATF. Mabuti na lang at naplantsa ang gusot na ito.

Huwag nating isipin na dahil matatas sa English ang ilan sa atin at karamihan ay nakakaintindi ng wikang ito ay sapat na pang-akit para tayo ang mapili na paglilipatan ng mga banyagang kumpanya. Kita naman sa surbey ng JETRO at ng WORLD BANK ang ebidensya  na hindi English language proficiency ang pang-akit sa banyagang kumpanya na naghahanap ng bagong bansa na pagtatayuan ng kanilang production chain.

Magaling ang Pilipino pagdating sa mga wika. Kahit walang pormal na training, karamihan ng mga entertainers natin sa Japan ay natutong mag-Nihonggo. Ang pagiging multi-linguwal ng mga OFWs ay dagdag na patunay nito. Sa mundo ngayon, kamangmangan ang monolingualismo at bilingualismo. Kaya’t daig natin ang taong iisa o dalawa lang ang wikang alam.  Kailangan lang buksan ang pag-iisip ng mga Pilipino.

Marami pang dapat ayusin para makahabol tayo sa mga karibal na bansa sa ASEAN  pagdating sa logistics performance score. Kaya natin ito. Kailangan lang may magkukumpas at mananatiling nakatutok sa logistics performance components. Totoo, kailangan ang peace and order, subalit hindi maaaring ito lang ang gugugulan ng pansin, pondo at puwersa ng pamahalaan. Ang pagkakataon natin na makaabante sa larangan ng global trade ay abot-tanaw na at hindi ito dapat palampasin.