Sa ‘port congestion’ dapat may ‘masampolan’

February 28, 2019

MARAMI sa mga miron sa pantalan ang “nabuhayan ng pag-asa” matapos makipagpulong si Bureau of Customs (BoC) commissioner, Rey Leonardo ‘Jagger’ Guerrero noong Pebrero 19, sa mga miyembro at opisyales ng ating ‘Fil-Chinese community’ sa “bandila” ng ating mga kaibigan sa ‘FFCCII’ (Federation of Filipino Chinese Chamber of Commerce and Industry, Inc.).

Isang malaking grupo ng ‘stakeholders’ sa Aduana ang mga Fil-Chinese at kung papansinin pa nga, mga kabayan, “tradisyunal” na sa mga ‘commissioner of customs’ ang magpugay, agh, makipag-usap sa FFCCII, hehehe.

(Kung sabagay, ang FFCCII ang unang “binisita” ng NPC nang manalo akong pangulo noong 2016, bilang pagpapahalaga rin ng NPC sa mahalagang papel ng FFCCII sa ating lipunan at sa malasakit nito sa hanay ng media).

At “nabuhay” nga ang “pag-asa” ng mga ‘stakeholders’ sa pantalan dahil ayon sa ating mga miron, hindi “iniwasan,” bagkus, “hinarap” ni Comm. Jagger ang hindi nawawalang problema ng ‘port congestion.’

Ang tanong pa nga nila: ‘Si Comm. Jagger na kaya ang “sagot” sa problema ng port congestion?

Hindi natin “minemenos” ang mga nakaraang administrasyon sa Aduana, partikular na si ex-Comm. Sid Lapeña, dear readers, subalit, “malinaw” ang resulta, hindi ba? “Walang nangyari, hehehe, ayy, huhuhu!

* * *

Sa problema ng port congestion, hindi masama kung “magtamang hinala” si Comm. Jagger sa “sinseridad” ng mga ‘international shipping lines,’ ng mga ‘private arrastre operators’ at kahit ng mga opisyal ng BoC na inatasan niya para bigyan ng solusyon ang isyung ito.

Dangan nga kasi, Pang. Rody at Comm. Jagger, alam ba ninyo na bilyones ang kuwartang “naibubulsa” ng ilang grupo habang may port congestion?

Kumbaga, parang problema lang din ng media ang sitwasyon ngayon sa pantalan, tama ba, mga kapatid sa hanapbuhay?

Sa panig ng media, may mga grupo na nagkakamal ng milyones mula sa “donasyon” galing sa labas ng bansa hangga’t patuloy na “mapanganib” ang ‘Pinas sa media (dangerous place for journalists).

Translation? Hindi pabor sa kanilang pansariling interes na masolusyunan ang isyu ng ‘media violence’ sa ‘Pinas kaya, bakit naman nila “seryosong” hahanapin ito, aber?

At ganito rin ang “masamang asal” na nakikita ng ating mga miron sa pantalan sa hanay ng mga ‘shipping lines’ at ‘arrastre operators.’

Dahil nga kasi may port congestion, may dahilan sila na magpataw ng mga samu’t-saring bayarin, sa hanay ng mga may transaksyon sa Aduana -- truckers, brokers, importers, etc., etc.

Andyan ang ‘import surge charge, port congestion charge, detention charge, etc., etc.

Ang masahol pa nga, sa nangyaring ‘port congestion’ noong 2014 sa administrasyon ni Noynoy, mistulang “niraket” pa nga ang sitwasyon dahil sa “pagpasok” sa “eksena” nitong ‘TABS’ (Terminal Advance Booking System) kung saan sa PRIBADONG BANK ACCOUNT pumapasok ang bayad dito.

Kung hindi garapal na korapsyon ang tawag dito, eh, ano kaya, dear readers?

Translation? “Pinagkakakitaan,” Comm. Jagger, ng ilang grupo ‘yang matagal nang problema ng port congestion kaya nga ang ‘reminder’ natin, naniniwala ka ba na “seryoso” at “sinsero” ang mga kausap mo -- at kahit ang “emisaryo” mo sa kanilang hanay na mahanapan nang totoong solusyon ang problemang yan?

Mayroon tayong kasabihan, mga kabayan, na “kung gusto may paraan, kung ayaw, may dahilan.”

At sa ganang atin, ganito ang “prinsipyo” sa katawan ng mga gahamang shipping lines.

Kung gugustuhin kasi nila at kung seryoso sila, eh, dapat matagal na silang may mga sariling ‘depot’ at private container yards hindi ba, mga kabayan?

Subalit hanggang ngayon, pulos “dribol,” “plano” at “pangako” lang ang naririnig ng mga stakeholders sa kanila.

Sabagay nga, wala naman kasing “nasasampolan” sa mga buwitreng ito kaya ‘they continue to laugh over the misery of the stakeholders on their way to the bank.’

Eh, sampolan mo kaya Comm. Jagger ng ‘economic sabotage’ at ‘plunder’ yang mga yan? Ewan lang natin kung hindi sila “matauhan,” hehehe!

Alam nating “sinsero” si Comm. Jagger na mapabilis pa ang mga proseso at transaksyon sa pantalan kaya harinawang “siya” na nga ang “anghel dela guwardiya” na “puputol” sa “sungay” ng mga dambuhalang mapagsamantala sa pantalan.

Abangan!