‘Top-to-bottom reshuffle’ ng Bureau of Customs-Customs Intelligence & Investigation Service, napapanahon

January 10, 2019

BAGO ang lahat, mainit munang pagbati kay BoC-RCMC Deputy Commissioner, Jess Fajardo, at CIIS agent, ‘Mam’ Arneth Manquiquis, na nagdiwang ng kanilang kaarawan kahapon.

And yes, Mam Arneth, salamat sa ‘ice cream,’ hehehe!

* * *

Magandang pagkakataon, ex-Phil. Army Vice Commander, MGen. Harold Cabreros, na “napasyal” ulit ako kahapon sa opisina ng IG sa POM. Bukod nga sa “nakalibre” ako sa ‘ice cream,’ muli akong nagkaroon ng pagkakataon na muling “makamayan” ang ‘mistah’ ninyo ni ex-AFP chief at BoC commissioner, Jagger Guerrero, na si Deputy Commissioner for Intelligence, BGen. Raniel Ramiro.

Dangan nga kasi, “huli” nga pala kaming nagkausap ni Gen. Ramiro, bago siya nagretiro sa serbisyo, noong 2016, nang ang inyong lingkod ay gawing ‘honorary member’ ng 3rd Infantry ‘Spearhead’ Division, kaya masasabing ‘reunion’ naming dalawa ang pagkikita namin kahapon -- sayang nga lang at walang ‘beer,’ hehehe!

“Beterano” na pagdating sa ‘intelligence operation’ si Gen. Ramiro kaya masasabing ‘right choice’ siya ni Comm. Jagger, sa hanay ng kanyang mga mistah, na ipuwesto bilang “DCI” (deputy commissioner for intelligence), isa sa mga “sensitibo” at “makapangyarihan” na posisyon sa buong Aduana.

At natutuwa naman tayo, dear readers na bagaman matagal kaming hindi nagkita ay agarang nabalik ang aming “tiwala” sa isa’t-sa kaya bagaman sensitibo at ‘confidential’ kung minsan ang aming huntahan, ‘no holds barred’ naman, yeheyy!!

* * *

Isa sa mga “problema” na palaging “sumasalubong” sa sino mang nauupo sa BoC-IG dear readers, ay ang panis na estilong ‘Oplan Pakilala’ nang kung sinu-sinong “nagmamalasakit” (kuno) dito kay Comm. Jagger at DCI Raniel.

‘Yun bang…  “nagpapaalerto” nang mga kargamento na ang “ultimo resulta” ay “magpakilala” lang naman sa  ‘customs brokers’ at mga ‘importer’ na “sila” ang dapat “kausapin” kung “ayaw” nilang muling maalerto ang kanilang kargamento. Sa terminong “pulis,” ang tawag dito ay ‘Oplan Pakilala,’ hehehe!

‘Yun nga lang, dear readers, ang “patibong” na ito ang isa pala sa mga “binabantayan” ni DCI Raniel at Comm. Jagger, kaya puwede ba, alias “Jun D” at “Kiko,” tigilan na ninyo ang “pang-uurot” ninyo, dahil bistado na kayo, hehehe!

At hindi pa ba sapat ang mga “naibulsa” ninyong mga “tara” sa napakahabang panahon bilang mga ‘scanner’ at ‘confidential informant’ kaya muli at muli ay nagpipilit kayong “makabalik” sa pantalan?

Hindi pa ba sapat na mayroon na kayong sariling ‘brokerage’ na ang puhunan ay galing sa inyong kawalanghiyaan?

Isa pang notoryus na pangalan na muli at muli nating naririnig dyan sa pantalan ay itong si alias ‘Abu Sarap’ na sa mahabang panahon ay nagawang “paikutan” noon si DCI Jessie Dellosa.

At dahil walang kawalanghiyaan na hindi nabubunyag, sa dakong huli ay nabisto rin ni DCI Jessie ang mga kabulastugan nitong si Abu Sarap kaya nga kasama ang pagmumukha nito at pangalan sa ‘IG Rogues Gallery’ na ipinalabas pa noon ni DCI Jessie sa Phil. Daily Inquirer.

Harinawang hindi magkamali sina Comm. Jagger at DCI Ramiro na kunin ang “serbisyo” nang sino man sa mga ito dahil sila ang “mantsa” na sisira sa kredibilidad ng kanilang layunin na totoong ireporma ang Aduana -- sigurado ‘yan!

Isa pa rin sa problemang binabantayan ni DCI Raniel hinggil sa pag-alerto ng mga kargamento ay ang estilong panis (din) ng ilang operatiba d’yan sa CIIS na ipaalerto ang ano mang kargamento para lang perwisyuhin -- at pumabor sa kanilang mga “alagang” smuggler.

Bukod dito, ginagamit din ang ‘power to alert’ ng IG ng ilang mga tiwali sa CIIS sa kanilang “bersyon” ng ‘Oplan Pakilala,’ partikular sa hanay ng mga ‘consignee’ na walang ibinibigay na “timbre” sa kanila.

Aber, ito ngang isang ‘consignee’ na “pinerwisyo” ng CIIS noon pang nakaraang buwan, higit isang milyon na ang gastos sa demurahe at ‘storage’ aba’y “ayaw pa ring tantanan” ng CIIS, talaga rin naman!

Matapos “mapalundag” ang tanggapan ni Comm. Jagger na “bigas” ang laman ng ‘shipment’ kaya dapat isyuhan ng alert, napatunayang “kuryente” ang kanilang impormasyon dahil kahit isang gramong bigas, wala namang nakita nang aktwal na buksan ang mga container.

Tapos na ba ang ginawang “pahirap” ng CIIS, DoF Secretary, Sonny Dominguez?

Aba’y hindi pa po, Mr. Secretary, dahil ang kargamento hindi pa rin nailalabas hanggang ngayon. Samantala, higit P1.5 milyon na ang “isinuka” ng pobreng consignee, hehehe, ayy, huhuhu!

At ang “masakit” pa dito, ‘yung iba pang darating pa lang na kargamento ng ‘consignee,’ muling ipinaalerto sa OCCOM— sa “sulsol” na naman umano ng CIIS, anlufet talaga hindi ba, Pang. Rody?

Translation? Hindi ba dapat “napahiya” na dito ang CIIS na “salto” ang kanilang ‘intel’ at “pinabayaan” na lang ang mga kargamentong darating pa lang?

At bakit mga ‘small time’ lang ang “target” ng CIIS ngayon? Paano na ang mga ‘big time’ at higit sa lahat ang mga sindikato ng iligal na droga? Hindi ba sa mga ito dapat “nakatutok” ang tanggapan ni Dir. Jeff Tacio?

Sa nakikita nating ginagawang “pagkakalat” ngayon ng CIIS, napapanahon na talaga ang “iniisip” ni DCI Raniel na ‘top-to-bottom reshuffle’ nang buong IG-CIIS. Para naman maibalik ang kredibilidad nito.

Abangan!